[72] นเหตุปจฺจยา อารมฺมเณ จตฺตาริ, อธิปติยา ปญฺจ (อนุโลมมาติกา)…เป.… อวิคเต สตฺตฯ
สํกิลิฏฺฐทุกํ นิฏฺฐิตํฯ
78. กิเลสสมฺปยุตฺตทุกํ
1. ปฏิจฺจวาโร
[73] กิเลสสมฺปยุตฺตํ ธมฺมํ ปฏิจฺจ กิเลสสมฺปยุตฺโต ธมฺโม อุปฺปชฺชติ เหตุปจฺจยา – กิเลสสมฺปยุตฺตํ เอกํ ขนฺธํ ปฏิจฺจ ตโย ขนฺธา…เป.… ทฺเว ขนฺเธ…เป.…ฯ (1)
กิเลสสมฺปยุตฺตํ ธมฺมํ ปฏิจฺจ กิเลสวิปฺปยุตฺโต ธมฺโม อุปฺปชฺชติ เหตุปจฺจยา – กิเลสสมฺปยุตฺเต ขนฺเธ ปฏิจฺจ จิตฺตสมุฏฺฐานํ รูปํฯ (2)
(กิเลสสมฺปยุตฺตทุกํ สํกิลิฏฺฐทุกสทิสํ, นินฺนานากรณํฯ)
กิเลสสมฺปยุตฺตทุกํ นิฏฺฐิตํฯ
79. กิเลสสํกิเลสิกทุกํ
1. ปฏิจฺจวาโร
เหตุปจฺจโย
[74] กิเลสญฺเจว สํกิเลสิกญฺจ ธมฺมํ ปฏิจฺจ กิเลโส เจว สํกิเลสิโก จ ธมฺโม อุปฺปชฺชติ เหตุปจฺจยา – โลภํ ปฏิจฺจ โมโห ทิฏฺฐิ ถินํ อุทฺธจฺจํ อหิริกํ อโนตฺตปฺปํ (จกฺกํ)ฯ (1)
กิเลสญฺเจว สํกิเลสิกญฺจ ธมฺมํ ปฏิจฺจ สํกิเลสิโก เจว โน จ กิเลโส ธมฺโม อุปฺปชฺชติ เหตุปจฺจยา – กิเลเส ปฏิจฺจ สมฺปยุตฺตกา ขนฺธา จิตฺตสมุฏฺฐานญฺจ รูปํฯ (2)
กิเลสญฺเจว สํกิเลสิกญฺจ ธมฺมํ ปฏิจฺจ กิเลโส เจว สํกิเลสิโก จ สํกิเลสิโก เจว โน จ กิเลโส จ ธมฺมา อุปฺปชฺชนฺติ เหตุปจฺจยา – โลภํ ปฏิจฺจ โมโห ทิฏฺฐิ ถินํ อุทฺธจฺจํ อหิริกํ อโนตฺตปฺปํ สมฺปยุตฺตกา จ ขนฺธา จิตฺตสมุฏฺฐานญฺจ รูปํฯ (3)
2-6. สหชาต-ปจฺจย-นิสฺสย-สํสฏฺฐ-สมฺปยุตฺตวาโร
(เอวํ ปฏิจฺจวาโรปิ สหชาตวาโรปิ ปจฺจยวาโรปิ นิสฺสยวาโรปิ สํสฏฺฐวาโรปิ สมฺปยุตฺตวาโรปิ กิเลสทุกสทิสาฯ นินฺนานากรณํฯ อามสนํ นานํฯ)
7. ปญฺหาวาโร
1. ปจฺจยานุโลมํ
1. วิภงฺควาโร
เหตุปจฺจโย
[75] กิเลโส เจว สํกิเลสิโก จ ธมฺโม กิเลสสฺส เจว สํกิเลสิกสฺส จ ธมฺมสฺส เหตุปจฺจเยน ปจฺจโย – กิเลสา เจว สํกิเลสิกา จ เหตู สมฺปยุตฺตกานํ กิเลสานํ เหตุปจฺจเยน ปจฺจโย (เอวํ จตฺตาริ, กิเลสทุกสทิสํฯ) (4)
อารมฺมณปจฺจโย
[76] กิเลโส เจว สํกิเลสิโก จ ธมฺโม กิเลสสฺส เจว สํกิเลสิกสฺส จ ธมฺมสฺส อารมฺมณปจฺจเยน ปจฺจโย – กิเลเส อารพฺภ กิเลสา อุปฺปชฺชนฺติฯ (มูลํ กาตพฺพํฯ) กิเลเส อารพฺภ สํกิเลสิกา เจว โน จ กิเลสา ขนฺธา อุปฺปชฺชนฺติฯ (มูลํ กาตพฺพํฯ) กิเลเส อารพฺภ กิเลสา จ สมฺปยุตฺตกา จ ขนฺธา อุปฺปชฺชนฺติฯ (3)
[77] สํกิเลสิโก เจว โน จ กิเลโส ธมฺโม สํกิเลสิกสฺส เจว โน จ กิเลสสฺส ธมฺมสฺส อารมฺมณปจฺจเยน ปจฺจโย – ทานํ…เป.… สีลํ…เป.… อุโปสถกมฺมํ…เป.… ปุพฺเพ สุจิณฺณานิ…เป.… ฌานา วุฏฺฐหิตฺวา ฌานํ ปจฺจเวกฺขติ, อสฺสาเทติ อภินนฺทติ, ตํ อารพฺภ ราโค อุปฺปชฺชติ…เป.… อุทฺธจฺจํ อุปฺปชฺชติ, ฌาเน ปริหีเน วิปฺปฏิสาริสฺส โทมนสฺสํ อุปฺปชฺชติ; อริยา โคตฺรภุํ ปจฺจเวกฺขนฺติ, โวทานํ ปจฺจเวกฺขนฺติ, จกฺขุํ…เป.… วตฺถุํ สํกิเลสิเก เจว โน จ กิเลเส ขนฺเธ อนิจฺจโต…เป.… โทมนสฺสํ อุปฺปชฺชติ; ทิพฺเพน จกฺขุนา รูปํ ปสฺสติ…เป.… อาวชฺชนาย อารมฺมณปจฺจเยน ปจฺจโย (อิตเร ทฺเว กิเลสทุกสทิสา, ฆฏนารมฺมณาปิ กิเลสทุกสทิสา)ฯ